Papa Françesku ka ndërruar jetë në moshën 88-vjeçare. Papa Françesku ndërroi jetë të hënën e Pashkëve, më 21 prill 2025, në rezidencën e tij në Casa Santa Marta, sipas një deklarate të Vatikanit.
“Të dashur vëllezër dhe motra, me dhimbje të thellë duhet të njoftoj vdekjen e Atit tonë të Shenjtë Françesku. Në orën 07:35 të mëngjesit të sotëm peshkopi i Romës, Françesku, u kthye në shtëpinë e Atit. E gjithë jeta e tij iu kushtua shërbimit të Zotit dhe Kishës së Tij. Ai na mësoi të jetojmë me fisnikërinë dhe vlerat universale të ungjillit, në favor të më të varfërve. Me mirënjohje të pamasë për shembullin e tij si dishepull i vërtetë i Zotit Jezus, ne e përgëzojmë shpirtin e Papa Françeskut për dashurinë e pafund të mëshirshme të Zotit”, tha ai.
Të Dielën e Pashkëve, Papa Françesku u shfaq në ballkonin e Bazilikës së Shën Pjetrit për të uruar besimtarët për festën e Pashkëve. Por për shkak të gjendjes së tij të rënduar shëndetësore, mesazhin e lexoi Imzot Diego Ravelli. Pasi bekoi të pranishmit Ati i Shenjtë përsëriti thirrjen e tij për një armëpushim në Gaza dhe dënoi konfliktin.
Jorge Mario Bergoglio lindi në Buenos Aires të Argjentinës më 17 Dhjetor të vitit 1936. Ai ishte papa i parë nga Amerika e Jugut dhe njëkohësisht i pari papë Jezuit.
Papa, i cili ishte peshkop i Romës dhe kreu i Kishës Katolike, u bë Papë në vitin 2013 pasi paraardhësi i tij Benedikti XVI dha dorëheqjen. Vitet e fundit, papati i tij ishte shënuar nga disa vizita spitalore dhe shqetësime për shëndetin e tij.
Daljet e tij të fundit
Në karrocën me rrota të shtyrë nga infermieri Massimiliano Strappetti dhe i vëzhguar nga afër nga xhandarët, Papa tetëdhjetë e tetë vjeçar mund të shihet me tub oksigjeni në hundë, pa kapelen në kokë dhe me një lloj ponçoje të rëndë me vija bezhë dhe kafe.
Për më tepër, Ati i Shenjtë nuk mbante veshur rrobën e bardhë, por pantallona të zeza normale, me sa duket në një përpjekje për të kaluar sa më pa u vënë re midis turistëve që ndodheshin në Shën Pjetër në atë moment. Megjithatë ai është shfaqur i qetë dhe i buzëqeshur.
Më 14 shkurt, Papa u shtrua në spital për trajtimin e bronkitit. Në ditët që pasuan, Vatikani njoftoi se ai ishte diagnostikuar me pneumoni bilaterale dhe kishte marrë transfuzione gjaku pasi analizat treguan nivele të ulëta të trombociteve në gjak, një gjendje që lidhet me aneminë.
Më 22 shkurt, u tha se Papa ishte në gjendje kritike pas një “krize të zgjatur respiratore” që kërkonte përdorimin e oksigjenit me fluks të lartë, dhe të nesërmen Vatikani njoftoi se Françesku po shfaqte shenja të “lehta fillestare” të dështimit të veshkave.
Në ditët që pasuan, mijëra besimtarë u mblodhën në Sheshin e Shën Pjetrit për t’u lutur për shërimin e tij, ndërsa të tjerë shkuan në spitalin e Romës ku ai po qëndronte, duke lënë lule dhe kartolina.
Ai qëndroi në spital gjatë gjithë muajit, me mjekët që thanë se gjendja e tij mbeti “komplekse”.
Më 6 mars, zëri i tij u dëgjua për herë të parë që nga shtrimi në spital, në një mesazh audio, ku falënderoi të gjithë ata që i kishin uruar shërim të shpejtë, duke shtuar: “Jam me ju nga këtu.”
Të dielën, ai përshëndeti turmat gjatë Meshës së Pashkës.
Qëndrimi i tij 38-ditor në spital përfundoi më 23 mars kur bëri paraqitjen e tij të parë publike pas pesë javësh në një ballkon të spitalit Gemelli, ku buzëqeshi dhe ngriti gishtin e madh për turmën e mbledhur jashtë.
Ai u kthye në Vatikan, duke ndalur papritur në bazilikën e tij të preferuar gjatë rrugës për në shtëpi, përpara se të fillonte dy muaj pushim dhe rikuperim të përshkruar nga mjekët.
Mjekët thanë se Françesku do të kishte në dispozicion oksigjen shtesë dhe kujdes mjekësor 24 orë në ditë sipas nevojës – duke shtuar se ndonëse infeksioni nga pneumonia ishte trajtuar me sukses, Papa do të vazhdonte të merrte ilaçe orale për një kohë të gjatë për të trajtuar infeksionin kërpudhor në mushkëri dhe të vazhdonte fizioterapinë e frymëmarrjes dhe atë fizike.
