4
Tet
Kryetarja e Komisionit të Medias Fatjona Dhimitri e ka quajtur një rast të jashtëzakonshëm të censurës së medies në një rend demokratik shoqërimin në polici të dy gazetarëve të portalit Syri.net. Sipas deputetes së opozitës parlamentare, drama e qeverisjes së dështuar të Rilindjes vazhdon. në një status në profilin saj në Facebook, ajo ngre shqetësimin për gjendjen e vështirë, që po kalon media. “Ekonomi e rrënuar, shqiptarë të varfëruar, shëndetësi jofunksionale, sistem arsimor i pareformuar, Akademi Shkencash e politizuar. Media e censuruar. Fjala e lirë po mbytet nën terrin mediatik që Kryeministri në ikje çdo ditë po e zhyt Shqipërinë. Shoqërimi në polici disa ditë më parë i dy gazetarëve të Syri.net , presionet politike ndaj tyre, përbën një rast të jashtëzakonshëm të censurës së medias në një rend demokratik.”, shkroi ajo. Dhimitri e konsideron uzurpim praninë e tatimeve në redaksinë e syri.net “ Kjo demostron më së miri që Kryeministri ka frike nga e vërteta dhe përballja me realitetin. Një realitet që detyron shqiptarët të braktisin vendin.” ajo bëri thirrje që organet ligjzbatuese duhet të fillojnë menjëherë procedurat ligjore për të hetuar këtë rast. “Nëse kalon në harresë rrezikon të përbëje një precedent të rrezikshëm në të ardhmen duke cënuar fjalën e lirë, themelet e demokracisë së një vendi”, përfundoi ajo.
