Ferragnez-ët nuk ekzistojnë më: pas muajsh spekulimesh dhe thashethemesh, Gjykata e Milanos ka formalizuar ndarjen mes reperit të njohur Fedez dhe sipërmarrëses digjitale Chiara Ferragni. Vendimi, i dhënë më 12 dhjetor, shënon fundin e një martese që zgjati mbi gjashtë vite dhe prej së cilës lindën dy fëmijë, Leone dhe Vittoria.

Çifti arriti një marrëveshje në kohë rekord, duke treguar, sipas avokatëve të Fedez, «pjekuri të jashtëzakonshme dhe gatishmëri të ndërsjellë për të vepruar në interes të fëmijëve të tyre». Fëmijët do të kalojnë kohë me të dy prindërit, por do të jenë kryesisht nën kujdesin e nënës.

Nga ana financiare, Fedez do të mbulojë shpenzimet shkollore, mjekësore dhe sportive të fëmijëve, ndërsa nuk është parashikuar asnjë pension ushqimor për Chiara Ferragni. Ndërkohë, ndarja e pasurisë dhe aktiviteteve profesionale, për shkak të pavarësisë së tyre të ndarë gjatë martesës, nuk paraqiti ndonjë problem.

Siç konfirmuan avokatët Pompilia Rossi, Alessandro Simeone dhe Andrea Pietrolucci, të cilët përfaqësojnë Fedez, “në gjashtë muajt e ardhshëm do të shpallet edhe divorci, siç kërkohet shprehimisht me një dokument të vetëm nga këngëtari dhe influencerja”. Një formalitet që do të vulosë përfundimisht mbylljen e një marrëdhënieje që kishte humbur tashmë çdo zyrtaritet muajt e fundit.

Fedez ka lënë banesën familjare dhe është parë shpesh në shoqërinë e partnereve të reja gjatë verës. Ndërkohë, Chiara Ferragni ka bërë publike lidhjen e saj të re me Giovanni Tronchetti Provera. Për sipërmarrësen digjitale, ky vit ka qenë një nga më të vështirët. Ajo e pranoi publikisht në rrjetet sociale: «Ka qenë viti më i vështirë i jetës sime».

Tashmë të dy ish-bashkëshortët duket se janë gati për të nisur kapituj të rinj në jetën e tyre. Chiara Ferragni fokusohet në sfida të reja profesionale dhe në marrëdhënien e saj të re, ndërsa Fedez planifikon rikthimin e tij në skenë në Festivalin e Sanremos 2025.