Kryetari i Kuvendit, Gramoz Ruçi priti sot në takim David Kostelancik, Drejtor për Europën Qendrore e Jugore në Departamentin Amerikan të Shtetit. Ruçi i shprehu Kostelancik mirënjohjen për mbështetjen e vazhdueshme të ShBA për Shqipërinë.
Drejtori David Kostelancik vuri në dukje se Ballkani është me rëndësi jetike për ShBA, Shtëpinë e Bardhë, Departamentin e Shtetit dhe Sekretarin Pompeo.
Ai nënvizoi gjjithashtu mbështetjen e ShBA për reformën në drejtësi, me fokus të veçantë rivlerësimin e prokurorëve dhe gjyqtarëve: “Institucionet e reja të sistemit do tu shërbejnë qytetarëve sot e në të ardhmen dhe do të mundësojnë që shqiptarët të jetojnë në paqe e mirëqenie. Vettingu është mbështetur dhe do të vazhdojë të mbështetet fort nga ShBA.”
Kostelancik vuri në dukje nevojën për kryerjen e reformës zgjedhore dhe rekomandoi se është përgjegjësi e qeverisë që dora e shtrirë e për opozitën duhet të mundësojë tërheqjen e saj në realizimin e kësaj reforme. Kryerja e reformës zgjedhore brenda vitit do të mundësoje edhe një presidencë shqiptare të suksesshme të OSBE-së në vitin 2020.
Kryetari i Kuvendit nënvizoi se shumica qeverisëse dhe ai personalisht janë të angazhuar për kryerjen e reformës zgjedhore dhe për këtë do të bashkëpunojë edhe me opozitën parlamentare e joparlamentare, e cila ka të drejtën e vetos në komisionin e ri të reformës.
